I helga var 241 deltakarar innom rampelyset i høve Sogn og Fjordane-kappleiken. Det vart tevla i folkemusikk og folkedans, både solo, i par og i grupper og lag. Kappleiken vart opna ved song og spel av Indre Sunnfjord spelemannslag, samt dans av unge folkedansarar frå Viksdalen og opningstale av ordførar Jenny Følling. Deretter braka det laus med tevlingar og dans seinare på kvelden.
Laurdagen var det òg Smørbukkappleiken der heile 55 born og unge mellom 0 og 16 år deltok. Her vart det dansa og spelt, og nokre våga seg til og med på å framføre åleine. På Smørbukkappleiken var det berre vinnarar, og alle fekk ein velsmakande premie som takk for framføringa.
Vandrepremiane, som kvart år går til dei i spel, song og danseplassane med høgast poengsum, vart òg delt ut i år. Egil Furenes stakk av med vandrepremien i spel med sitt hardingfelespel. Kari Malmanger stakk av med vandrepremien i song med heile 99 av 100 poeng. Mari Andrea Ness og Atle Hoff stakk atter ein gong av med vandrepremiane i dans.
Arrangøren Indre Sunnfjord spelemannslag fekk stor skryt for eit godt gjennomført arrangement, der programmet glei godt og publikum og deltakarar var godt fornøgde. Det er tydeleg at dei har hausta mange erfaringar frå Landsfestivalen i gamaldans som dei arrangerte sommaren 2023. Truleg har dei òg hausta erfaringar frå Vestlandskappleiken i oktober i fjor, då kappleiken òg var skipa til på Thon hotell på Skei. Samarbeidet med hotellet har vore godt, og Thon hotell Jølster har med dette vorte ein attraktiv plass å arrangere kappleikar.
Alt i alt har det vore ein kjekk helg med nydeleg vårvær, mykje godt spel og dans, gode arrangørar og frivillige, og triveleg samvær i folkemusikk- og folkedansmiljøet i Sogn og Fjordane.
